Am Samsti 02.Mai 2026 het o d'Trachtegruppe Schwanden mit 8Lüt am Bärner Früehligsbau teil gno. Äs isch ä supper Abä gsi, mit guetem ässe, trinke, Musig und natürlech ä huufe guet gluunete Trachtelüt. Es het sehr gfägt, u o weme mau nid ganz het gwüsst i weli richtig dasme mues dräie u villech grad chli es blackout het gha wis witer geit, de hei die rächts u lings immer ghuufe. D'Füess hei gäge z'Ändi zue doch de langsam o afah wehdue u langsam simer aui müed worde, das het üs aber aues nid ufghaute no bis ganz am Schluss z blibe. Mir blickä ufene rundum glungnige Abä zrügg u si dankbar heimer dörfe drbi si!

Abschluss TG-Schwanden

Bevor üsi Tanz-/Sing- Pouse ahsteit simer zum Abschluss am 04. Apriu 2026 ds Rüderswil gah dr Osterwäg loufä. Mir hei üs am eufi troffä u si de aui zämä losgloffä dür dä Osterwäg. Ä erste haut het bir Lisa daheime es feins Zmittag gäh. Nach dere Sterchig si mir de witter gloffä u hei aui Rätsu u Spili womer hei gfunge glöst/gmacht. So isch dr Nami süüferli verbi gangä u de hets zum Abschluss bi "Burkhards Hofleckereien" no äs Dessert u öppis zum trinke gäh. Es isch e supper Abschluss gsi und mir fröie üs, we d'Üebige wider aföh u mir für d'Konzärt 2027 dörfe üebe.

Konzärt & Theater 2026

Ou das Jahr hei mir a 4ne Date üser Lieder u Tänz im Thalgrabe dörfe vor Publikum uffüehre. Dr Ahfang hei üser jüngste gmacht u hei dr Abä mitem Lied "Gute Laune" eröffnet. 18 Ching hei vouer Fröid ihrer Tänzli vorem Publikum vorgfüehrt. Ahschliessend si di grosse mitem Programm drannä gsi und hei immer abgwächslet mit singe u tanze. Z'Highlight vom Abä isch lut em Publikum dr lezt Tanz gsi- dr "Schottisch uf 2 Reihe". Nachem Programm vode grosse u ere Pouse ischs de witter gangä mitem Theather "d'Weicheier vom Chräiehof", das isch ä zwöiäkter wo turbulänt zue u här gangä isch. Mir möchte aune DANKE VIUMAU sägä wo si cho luege u hoffentlich bis nächst Jahr!

Gottesdienst Chiuche Landiswil

Am Sundi, 15. Februar 2026 heimer dörfe dr Gottesdienscht zum Thema «Was luegt use us dr Chiuche» in Landiswil musikalisch umrahme. Mit üsne drü Lieder «Petuneli», «I wünsch dir ä Rose» uh «Dämmerzyt» heimer dä Bsuecher es paar schöni Momente dörfe schänke. Di lehrriiche Wort u töifgründige Gedanke vom Pfarrer Stefan Lobsiger hei dä Gottesdienscht zume ganz bsungere Alass gmacht. Bim aschliessende Chiuchekafi heimer de no «I bi ä Bueb vom Ämmitau» vortreit, o dert heimer vo dä Bsuecher nomau ä grosse Applous dörfe entgägä näh…
Mir chöme gärn wider mau nach Landiswil i die wunderschöni Chiuche zum Singe.

Chindertanze im Läbensart Bärou

Am Samsti 14. Februar 2026 isch d'Chindertanzgruppä mit paar Erwachsnige iz Läbensart Bärou ihri Tänzli wosi glehrt hei gah uffüehre. Zwüschem Chindertanze hei mir no mit de Bewohner tanzet und Lieder gsunge. Mir hei e supper Namittag gha und hei de Bewohner e riese fröid chönne mache. Nachem Ahlas hets no öppis feins z'Ässä gäh- Mersi viu viu  mau! 

Sing- u Tanzwucheänd Lyss

Am 10. & 11. Januar 2026 het ds Sing- u Tanzwucheänd z Lyss stattgfunge wo paari vor Trachtegruppe Schwanden o hei teil gno. Düre Tag isch konzentriert tanzet & gsunge worde. Z Ässe isch o supper u meh aus gnue gsi, obwohl mir ono säuber öppis zum «Znüni» hei mitgno- dasmer de nachem tanze am 22:30Uhr jaaa no öppis chöi ässä, bevors iz Bett geit (siehe Foto...). Zwüsche de Probe isch natürlech o flissig Skirenne gluegt worde. Ob Tanzschritt, di richtige Töön bim singä oder Pischteanalyse – mir hei aues sehr ärnst gno. Viu z lache, gueti Gspräch, müedi Füess u vouii Büüch- es rundum glungnigs Tanzwucheänd, wo no lang i Erinnerig blibt.

Wiehnachtsfiir 2025

Am 08. Dezämber 2025 hetsech d'Trachtegruppe Schwanden zur Wiehnachtsfiir z'Rüderswil troffä. Bire gmüetleche Rundi u feinem Raclette isch viu glachet u brichtet worde. Mir fröie üs uf z'2026 u vorauem de uf d Konzärt im März!